18 Aniversario do Departamento de Capacidades Diferentes e Accesibilidade da RMPL
Este mes de setembro cúmprense 18 anos desde a creación do Departamento de Capacidades Diferentes e Accesibilidade na Rede Museística Provincial. Para conmemorar esta ocasión, estanse a realizar melloras na comunicación e na sinaléctica dos espazos.
Ao longo destes anos, o departamento foi recoñecido en numerosas ocasións por tecer redes e aprender continuamente xunto ao terceiro sector e os seus profesionais. A consciencia da importancia de mellorar constantemente é fundamental para avanzar cara a unha cultura accesible, integradora, igualitaria e sostible.
No marco da innovación e da investigación educativa, o persoal do departamento, baixo a coordinación de Encarna Lago, xerente da RMPL, está a desenvolver un novo proxecto de mellora da accesibilidade nos catro museos da Rede Museística.
Actualmente, as persoas con discapacidade representan o 15,38% do persoal dos museos, superando o 10% establecido pola lei. Entre elas, hai tres persoas cegas, que requiren adaptacións constantes dos seus postos debido ás novas programacións, reformas e melloras nos edificios. Este compromiso reflicte a dedicación a ofrecer un espazo de traballo e unha experiencia de visita inclusiva.
A implementación dun novo proxecto, desenvolvido en colaboración co CEAPAT e a ONCE, ten como obxectivo ofrecer unha solución innovadora de guiado para persoas con baixa ou nula visión, facilitando a súa mobilidade independente no interior dos museos mediante un sistema de instrucións vocais.
Este sistema permitirá acceder a información accesible en tempo real sobre o espazo e as obras de arte, ofrecendo diversos formatos como audiodescrición, linguaxe de signos española (LSE), lectura sinxela e tradución a 33 idiomas. Ademais, o sistema funcionará como audioguía con información multimedia actualizada e ofrecerá orientación mediante frechas de realidade aumentada.
Funcionalidades Destacadas
- Acceso á información desde unha gran distancia: Pódese ler un código a unha distancia que vai de 15 cm a 10 metros, facilitando o distanciamento social e o acceso á información das pezas e salas.
- Data de lanzamento: O sistema estará operativo a partir do 10 de outubro, coincidindo co Día Mundial da Visión.
- Como utilizalo?:
- Descarga a app NaviLens de forma gratuíta para IOS ou Android.
- Configura a aplicación segundo as preferencias.
- Escanea un código e goza da experiencia en calquera dos catro museos da RMPL.
Este sistema é especialmente útil para persoas cegas, xa que non require enfocar ou encadrar o código na pantalla, facilitando a súa utilización. Con este novo proxecto, continúa o compromiso por facer os museos espazos cada vez máis accesibles para todos.
