Profesionais da arte galega premian a RMPL

A Rede Museística Provincial de Lugo (RMPL) foi distinguida co I Recoñecemento A Colectiva na categoría de Espazo de produción e/ou exhibición de arte contemporánea no ámbito público. O galardón foi recollido pola Xerente da Rede Museística, Encarna Lago, no marco das Xornadas de Profesionalización para Artistas, celebradas no  Centro Galego de Arte Contemporánea (CGAC).

Este importante recoñecemento, outorgado pola Asociación Profesional de Artistas de Galicia (A Colectiva), subliña e pon en valor o compromiso firme da RMPL coa arte e cos profesionais da creación galega.

A Colectiva destacou o traballo e a xestión desenvolvida nos museos provinciais por varios motivos clave:

• Compromiso Ético: O respecto e a aplicación efectiva do Código de Boas Prácticas Artísticas.

• Traballo Continuado: A labor continuada de mediación cultural, facilitación de procesos creativos e difusión da arte contemporánea.

• Perspectiva Social: Unha marcada perspectiva social na súa aproximación á arte e á cultura.

A Asociación Profesional de Artistas de Galicia resaltou que o impulso dado dende a Rede Museística contribúe de maneira significativa a consolidar espazos públicos de referencia para a produción e exhibición da creación contemporánea, fomentando relacións profesionais baseadas na ética, o recoñecemento do traballo artístico e o acceso da cidadanía á cultura.