A Rede Museística Provincial de Lugo participa nas IV Xornadas sobre Mediación Cultural
A Rede Museística Provincial de Lugo (RMPL) participará esta semana nas IV Xornadas sobre Mediación Cultural e Cultura Comunitaria, un encontro organizado pola Universidade de Zaragoza e a Universidade de Santiago de Compostela. Baixo o título “Coidados, memorias e Cultura de Paz”, estas sesións terán lugar os días 26 e 27 de febreiro de 2026, vinculadas ao proxecto de innovación docente “Laboratorio de Dereitos Culturais e Diversidade Cultural” e ao Máster Universitario en Xestión da Arte e o Patrimonio Cultural da USC.
As xornadas contan con sedes en ambas as universidades. A intervención de Encarna Lago, xerente da RMPL, será o xoves 26 de febreiro, ás 17:30 horas, no Salón de Graos da Facultade de Xeografía e Historia da USC, en Santiago de Compostela. O seu relatorio, titulado “Experiencias da RMPL: Museoloxía Social, Saúde, Cultura de Paz e Bo Vivir”, explicará o traballo dos museos de Lugo como espazos de coidado e participación.
O programa das xornadas inclúe temas como as ruralidades, os dereitos culturais e a creatividade comunitaria. Xunto á RMPL, intervirán profesionais e entidades como a Fundación RIA, o Museo da Paz de Gernika ou La Ortiga Colectiva, co obxectivo de analizar a cultura como ferramenta de transformación e memoria.
