A Rede Museística Provincial de Lugo reforza en San Paio de Narla un relato vivo sobre desigualdades, memoria e xustiza social
Coincidindo coa celebración do 20 aniversario, a Rede Museística Provincial de Lugo dá un paso adiante na consolidación dun proxecto cultural transformador, entendendo que a arte pública non consiste en acumular pezas inertes, senón en provocar conversas necesarias entre o pasado e o presente. Nun acto que contou coa presenza do vicepresidente da Deputación, Efrén Castro, e da xerente da Rede, Encarna Lago, presentáronse no Museo Fortaleza San Paio de Narla cinco novas incorporacións ás coleccións provinciais, tres delas expostas nesta mesma sede. Estas obras, asinadas por Violeta Bernardo, Ruth Lodeiro e Isaac Senchermes Soldado, entran a dialogar de maneira directa co noso patrimonio histórico para interpelar a nosa realidade dende a igualdade, a diversidade e a xustiza social.
Este novo horizonte artéllase arredor do proxecto «Soterradas. Vidas e historias na procura da xustiza social», unha ollada institucional empeñada en desenterrar das marxes tantas vivencias que as narrativas históricas dominantes preferiron silenciar. A través dunha perspectiva interseccional, o proxecto transforma as pedras da fortaleza nun espazo onde as desigualdades se abordan de fronte, reforzando a idea de que os museos teñen o firme deber de facer visibles experiencias historicamente pouco representadas e construír relatos plurais.
Nese fío de complicidades e xenerosidade que nutre as nosas institucións, Violeta Bernardo acada o fito de converterse na única creadora con obra nos catro centros da Rede grazas á doazón de Pantasmas do pasado, unha peza que xa habita San Paio de Narla para completar un discurso arredor das mulleres e a memoria. Da man dese mesmo compromiso transformador, Ruth Lodeiro desprega unha cartografía de reivindicación a través da doazón de tres obras fundamentais: a sementeira de Semente fica exposta na propia fortaleza de Narla, mentres que Espiñas como Rosas e Babel se integrarán nos itinerarios do Museo Provincial de Lugo e do Museo Pazo de Tor, respectivamente.
A este percorrido consciente súmase a adquisición da peza Archivo 24, de Isaac Senchermes Soldado, tamén situada e exposta no Museo Fortaleza San Paio de Narla. Modelada con pole de abella, a obra utiliza a fermosa metáfora da polinización para reflexionar sobre as relacións de interdependencia e a diversidade do noso territorio. Dúas décadas despois do seu nacemento, a Rede Museística Provincial demostra que o patrimonio acada o seu verdadeiro sentido cando latexa coa xente, tecendo relatos vivos que nos axudan a comprender mellor de onde vimos para construír, xuntas e xuntos, unha sociedade máis xusta.
Obras presentadas
