De cor.

A memoria é un exercicio constante, un acto de resistencia para que as historias non se perdan. No marco da conmemoración do Día de lembranza e homenaxe a todas as vítimas do golpe militar, a guerra e a ditadura franquista, a Rede Museística Provincial de Lugo organiza o diálogo aberto “De cor. Diálogos para habitar a Memoria”. Este evento, que conta coa participación de AGAMA (Arxentinas en Galicia pola Memoria), busca afondar e visibilizar a memoria da nosa terra. Inspirados na loita das Nais e Avoas da Praza de Maio, entendemos que falar do que pasou é esencial para coñecer o traballo xa realizado e o que aínda resta por facer na recuperación das identidades e historias silenciadas, garantindo que a historia non se repita.

Unha conversa necesaria e unha mostra artística

Este encontro celebrarase no Museo Provincial de Lugo, na Praza da Soidade, o vindeiro xoves 23 de outubro, ás 19:00 horas. A entrada é gratuíta e o espazo é accesible, aberto a toda a cidadanía que desexe unirse á reflexión colectiva.

O diálogo contará con tres expertas que traballan pola memoria histórica desde diferentes eidos: Encarna Lago González, xerente da Rede Museística Provincial de Lugo; Chus Navarro Otero, mestra e figura clave na difusión da memoria democrática galega; e Carmen P.G. Granxeiro, artista e documentalista que utiliza a cultura para rescatar narrativas históricas silenciadas.

Durante o evento, poderase tamén gozar da mostra “Os fíos da presenza” de María Arufe Moares. A artista visual exhibirá unha serie de fotografías bordadas, unha técnica que utiliza como forma de recuperación simbólica da memoria. Mediante o bordado sobre imaxes antigas, Arufe convida a reflexionar sobre que recordos se manteñen e cales quedan esquecidos, devolvéndolle presenza a esas persoas anónimas e abrindo un diálogo entre o que se recorda e o que se borra.