A Rede Museística Provincial de Lugo abre un ano máis, o seu espazo de conversas iberoamericano. Tomando como referencia o lema do Día Internacional dos Museos, que neste 2025 será “O futuro dos museos en comunidades en constante cambio”, o Consello Internacional de Museos (ICOM) convídanos a reflexionar sobre o papel das nosas institucións como conectores da identidade cultural nun mundo en transformación, marcado por desafíos crecentes para a diversidade.

Desde a Rede cruzamos este marco internacional coa nosa propia liña de traballo no territorio, centrada nos retos sociais da museoloxía en relación coa interculturalidade: Como poden os museos ser espazos de acollida e representación reais? Que estratexias e metodoloxías están a poñer en marcha para dialogar e dar voz protagonista ás comunidades migrantes e racializadas? Como poden contribuír a unha sociedade máis inclusiva?

O ciclo estrutúrase en catro conversas, que terán lugar os martes de maio e que contarán coa participación de profesionais de referencia da contorna iberoamericana. Cada sesión combinará unha primeira parte de diálogo entre dúas convidadas e unha segunda parte de diálogo aberto coas participantes.

As conversas gravaranse e compartiranse en aberto, xunto con materiais adicionais, para favorecer a súa consulta posterior e a súa difusión.

En definitiva, propoñemos  un espazo para as aprendizaxes, a investigación e as preguntas que se materializará nun espazo virtual de aprendizaxe aberto durante todo o ano, o ciclo de conversas en primavera e un obradoiro ás portas do outono.