Ronsel: 100 anos despois

No corazón da cidade de Lugo, no Campo Castelo e na Praza Maior, eríxense dous portais cheos de historia. Pero, cal é o seu significado? E quen son esas figuras de bronce situadas na Praza Maior e na Praza Anxo Fernández Gómez, detrás do Concello? Evaristo Correa Calderón, por que unha rúa da cidade leva o seu nome?

Para descubrir as respostas a estas preguntas e moito máis, convidámosvos a visitar a exposición “Ronsel – 100 anos despois”, organizada pola Área de cultura da Deputación de Lugo, a través da Rede Museística Provincial, coa colaboración da Fundación lucense VA-CAN, que xestiona o legado do artista José Vázquez Cereijo. Esta mostra ofrece unha viaxe á intensa e efervescente actividade cultural que caracterizou Lugo nas décadas dos anos 20 e 30, ata o comezo da Guerra Civil en 1936.

“Ronsel”, unha revista bilingüe que, malia a súa curta vida, deixou unha pegada profunda no panorama cultural galego e nacional, serve como eixo central da exposición. A través dela, podémonos mergullar no talento literario, artístico e musical de figuras lucenses como Luís Pimentel, Ánxel Fole, Ángel Johan, Jesús Bal y Gay e Antón Noriega Varela, así como doutros referentes galegos como Castelao. Ademais, a revista contou coa participación de figuras internacionais como Norah Borges, irmá do célebre escritor arxentino Jorge Luis Borges.

A exposición ofrece unha ampla variedade de materiais, desde libros e revistas con cubertas coloridas e cheas de vida, ata cadros, retratos, esculturas, obra gráfica, correspondencia, fotografías, partituras e xornais antigos. Está deseñada para chegar a todos os públicos, desde nenos ata maiores, ofrecendo unha perspectiva ampla e educativa sobre o ambiente cultural da época.

Nun marco educativo, a Rede Museística Provincial de Lugo, dentro da súa programación escolar, propón actividades relacionadas coa exposición para todos os niveis educativos. A riqueza dos contidos permite o desenvolvemento de proxectos multidisciplinares que fomentan áreas como a lectura, as destrezas plásticas e musicais, o coñecemento histórico e o deseño gráfico. Tamén se traballan valores fundamentais como o traballo en equipo, a igualdade e a identidade galega, reflexionando sobre a participación das mulleres na época e a liberdade de expresión.

Cen anos despois do nacemento de “Ronsel”, o noso mundo é moi distinto, pero grazas a esta exposición, podemos revivir por un intre a visión e o entusiasmo cultural da sociedade lucense de 1924.