Visitas Guiadas nos Museos da Rede
Dentro da programación especial de verán, a Rede Museística Provincial de Lugo convida a todas as persoas a descubrir a riqueza cultural, histórica e patrimonial da nosa provincia a través dun completo programa de visitas guiadas totalmente gratuítas. De martes a venres, os catro espazos que conforman a rede abren as súas portas para ofrecer unha experiencia única, deseñada para achegar o noso legado a todos os públicos durante esta tempada estival.
Para facilitar a planificación das vosas xornadas de lecer, as visitas están estruturadas en catro quendas diarias con horarios fixos. Deste xeito, poderedes gozar destes percorridos acompañados na quenda de mañá, ás 11:00h e ás 12:30h, ou na quenda de tarde, con sesións programadas para as 16:30h e as 18:00h.
A nosa oferta esténdese de norte a sur para amosar a diversidade do territorio. No corazón da provincia poderedes mergullarvos no Museo Provincial de Lugo, situado no emblemático casco histórico da capital. A poucos quilómetros, na comarca de Lugo – Terra Chá, agarda a impoñente fortaleza do Museo San Paio de Narla, localizada no lugar de Narla, a tan só 7 quilómetros do núcleo do Concello de Friol.
Se preferides a brisa do mar, poñendo rumbo á Mariña Lucense atoparedes o Museo do Mar, emprazado no mesmo centro do pobo costeiro de San Cibrao, no Concello de Cervo. Pola contra, se buscades a maxia do interior, a contorna da Ribeira Sacra ofrécevos unha viaxe no tempo no Museo Pazo de Tor, situado no lugar de Tor a 6 quilómetros da capital de Monforte de Lemos.
Cómpre lembrar unha particularidade importante para a organización da vosa ruta: polas características singulares do Museo Pazo de Tor, as visitas a este espazo requiren sempre de reserva previa. Podedes asegurar a vosa praza comodamente xestionando a petición vía telefónica no número 982 165 534 ou mediante o noso sistema de reservas na web a través da páxina https://comunidadermpl.gal/museos-lugo/pazo-de-tor/.
