Participa na actividade “Mulleres” no Pazo de Tor

O vindeiro venres 21 de novembro, o espazo do Pazo de Tor acollerá a actividade “Mulleres”, unha proposta cultural e educativa que convida á reflexión activa a través das artes escénicas.

Esta acción, aberta a todo o público asistente, encádrase dentro da programación conmemorativa do Día Internacional da Eliminación da Violencia contra a Muller e forma parte do programa “Cousas Nosas. Dereitos Culturais en acción. A educación e a Cultura de Paz”.

En que consiste a actividade? A xornada desenvolverase de 18:30 a 20:30 horas e estará dividida en dúas partes complementarias:

1. Proxección da obra “MULLERES”: O visionado dunha peza de autoría propia da Asociación Cultural Teatreiras. Esta obra, orixinalmente presentada ao Circuito de Teatro Afeccionado da Deputación de Lugo en 2020, foi gravada e difundida dixitalmente debido á pandemia. O seu formato audiovisual xa demostrou ser unha ferramenta pedagóxica moi potente en obradoiros de xénero con alumnado de secundaria.

2. Obradoiro práctico e Mesa Redonda: Tras a proxección, darase paso a un obradoiro de teatro participativo onde se traballará con personaxes arquetípicos, pechando a sesión cunha mesa redonda para compartir impresións, fomentar o debate e construír unha mirada crítica colectiva.

A actividade corre a cargo da Asociación Cultural Teatreiras (Monforte de Lemos), un referente do teatro amador que vén de cumprir 25 anos de traxectoria. O grupo está coordinado e dirixido por Francisca Abeledo, animadora sociocultural cunha ampla experiencia traballando nas escolas, institutos, residencias de maiores e casas da xuventude de toda a contorna (Monforte, Chantada, Castro Caldelas, Barbadás, etc.).