A Rede Museística e o Pazo de Tor celebran o seu dobre aniversario

Este ano marca un fito fundacional: cúmprese o 20º aniversario da creación da Rede Museística Provincial de Lugo e do Pazo de Tor. Para conmemorar estas dúas décadas de percorrido, toda a programación de actividades de verán deseñouse co obxectivo de dar o máximo protagonismo a este dobre aniversario, converténdoo no eixo central da axenda institucional.

Como parte desta conmemoración, o 9 de xullo ás 10:00 horas, o propio Pazo de Tor acollerá unha sesión do seminario “Museos, educación histórica y cultura democrática: Retos sociales desde la interseccionalidad crítica”. O encontro centrarase no relatorio “La Red Museística de Lugo. Un ejemplo de buenas prácticas desde una museología social y transformadora”, presidido por Cosme J. Gómez Carrasco da Universidad de Murcia, e coas intervencións de Ana Moreno Rebordinos do Museo Nacional del Prado, Rufino Ferreras Marcos do Museo Nacional Thyssen-Bornemisza e José Manuel Rey García do Servizo de Museos do Concello de Vigo.

Os actos centrais do aniversario continuarán o 12 de xullo ás 19:00 horas, cando a contorna do Pazo de Tor sirva de escenario para a representación da obra de Castelao “Os vellos non deben de namorarse”. A Asociación Cultural e Folclórica Os de Algures executará esta posta en escena, reproducindo o vestiario a partir dos debuxos do autor e respectando as súas indicacións sobre escenografía, movementos, uso de máscaras e músicas tradicionais. O acceso a este evento teatral será gratuíto e libre ata completar o aforo.

Engadíndose a estas datas sinaladas dentro das celebracións, o sábado 18 de xullo o Pazo de Tor será a sede do encontro “Sagra Forma” có actor Sergi López. Este evento abarcará conversas, un taller e proxeccións. O programa comezará cunha sesión de 11:00 a 14:00 horas centrada nunha conversa sobre a súa traxectoria, reflexións e inquietudes, seguida dun horario establecido para a comida de 14:00 a 16:00 horas.

Para completar esta programación dedicada ao vinte aniversario, desenvólvese o programa “Escola, Cultura e Territorio: Verán na Rede Museística”. Ao longo dos meses de xullo e agosto, os catro centros da rede ofrecerán obradoiros participativos para todas as idades. A participación require inscrición previa a través do correo electrónico concertacionsrmp@gmail.com.

Ademais, durante estes mesmos meses de xullo e agosto e como parte das celebracións do aniversario, ofreceranse catro visitas guiadas en todos os museos da rede. Os percorridos terán lugar de martes a venres coas quendas de mañá ás 11:00 e 12:30 horas, e as quendas de tarde ás 16:30 e 18:00 horas. Para asistir a estas visitas será necesaria a concertación previa a través do correo electrónico concertacionsrmp@gmail.com, agás no caso do Pazo de Tor, onde as reservas xestionaranse como vén sendo habitual vía telefónica (982 165 534) ou no sistema de reservas da web.