Casa de soga e coitelo

Ábrese un novo espazo musealizado que ao longo dos séculos tivo diversos usos no pazo. As noticias mais antigas fálannos de que na parte inferior desta sala estaría o vello cárcere da xurisdición. Hai que lembrar que o pazo ostentaba o dereito xurisdicional, tanto civil como criminal, o que lles daba o dereito de nomear os xuíces que velarían polo cumprimento das leis en todo o seu territorio. A eles ademais correspondíalles o deber de executar as sentenzas que ditaminasen os xuíces, o de cárcere incluído.

Pero este espazo, na súa parte superior tamén albergou o que se coñeceu como “El nido”, un espazo de esparexemento e diversión para os mozos da casa e do que queda o recordo polas súas pinturas que adornan as paredes.

Mais tarde, a mediados do século XX, D. José Taboada de Zúñiga utilizou este espazo para reunir nel todos os libros da casa e organizalos, creando a primeira biblioteca como tal que houbo no pazo. Un espazo que axudou a crear Angelita con nove anos, xa que a vista de D. José xa non era moi boa.

O espazo que musealizamos pretende rescatar todas estas historias soterradas respectando todos e cada un dos usos que tivo este espazo ao longo dos anos e as vivencias de quen os ocupou.