“Facémonos entender”
“Facémonos entender”
No Museo Provincial do Mar
O Museo Provincial do Mar organiza o vindeiro 18 de abril, entre as 11:30 e as 13:00 horas, o obradoiro infantil “Facémonos entender”, unha actividade deseñada para nenos e nenas de entre 6 e 12 anos.
Nesta proposta, os participantes convértense en mariñeiros á deriva para aprender os fundamentos da comunicación no mar. A actividade céntrase na aprendizaxe e uso do código Morse, a través de sinais de luz e son, e do Código Internacional de sinais. Estes sistemas son ferramentas esenciais para o entendemento a distancia en situacións críticas, como a presenza de néboa, a falta dunha lingua común ou a imposibilidade de establecer unha comunicación verbal.
O obradoiro desenvólvese mediante dinámicas cooperativas que culminan nunha misión de rescate. Nesta práctica, o grupo debe aplicar os códigos aprendidos con concentración e precisión, descubrindo que o acto de comunicar vai máis alá da palabra e consiste, fundamentalmente, en lograr que a mensaxe sexa comprendida polo receptor.
Para participar, podedes realizar a inscrición por correo electrónico, no teléfono 982 59 45 72 ou en persoa en San Cibrao.
