Territorio Textura

Este obradoiro propón unha aproximación artística e reflexiva aos vínculos co territorio que habitamos. A partir dunha reflexión colectiva, abordarase a análise das características e elementos que definen os espazos: a morfoloxía urbana, a mobilidade, os espazos verdes e os denominados “baleiros urbanos”.

Baseándose na participación cidadá e en teorías como a de Kevin Lynch en The Image of the City, o obradoiro busca trasladar estas ideas a obras artísticas únicas.

Mediante o uso de técnicas artísticas como a acuarela e o bordado sobre papel, proporcionarase aos participantes ferramentas para transformar percepcións e emocións sobre o territorio en creacións visuais. Ao longo do proceso, cada participante:

• Identificará un barrio, cidade ou territorio de referencia.
• Analizará os seus elementos máis representativos.
• Deseñará unha paleta de cores personalizada.
• Creará unha obra que combine textura, cor e sentimento, reinterpretando a relación co espazo.

O obradoiro está pensado para persoas con ou sen experiencia previa no ámbito artístico que desexen explorar o territorio desde unha perspectiva creativa, crítica e participativa.