“Fotografía de Rúa”

Lugo convértese esta fin de semana no escenario dunha experiencia fotográfica única. O Museo Provincial de Lugo  organiza este próximo fin de semana, en colaboración co Colectivo Ruando,  un obradoiro especializado en fotografía de rúa , unha disciplina que busca capturar a esencia da vida cotiá a través da mirada artística e a composición técnica.

A formación corre a cargo de Paulina Aleshkina, fotógrafa e docente con máis de dúas décadas de experiencia. Licenciada en Arte e Humanidades pola Universidade Estatal de Moscova , Aleshkina achega a Lugo a súa visión particular sobre a “poesía da fotografía callejera” , baseada na súa ampla traxectoria expositiva en centros como o Museo Provincial de Zaragoza ou o Festival PhotoEspaña.

Cronograma da actividade

O programa, que se desenvolve os días 7 e 8 de febreiro, está deseñado para profundar no dominio da linguaxe visual urbana:

• Sábado pola mañá (10:30 – 13:30 h): Sesión teórica sobre ferramentas de composición e o tratamento da luz natural, desde a luz dura ata a difusa.

• Sábado pola tarde (16:30 – 19:30 h): Xornada dedicada á práctica fotográfica directa nas rúas de Lugo, explorando os diferentes estilos desta disciplina.

• Domingo pola mañá (10:30 – 13:30 h): Sesión de peche no Museo co visionado dos resultados e a posta en común de consellos para o desenvolvemento do estilo persoal.