IX Xornadas de divulgación científica do patrimonio arqueolóxico lucense:

O claustro do Museo Provincial de Lugo foi o escenario elixido este 13 de marzo para a presentación oficial das IX Xornadas de Divulgación Científica do Patrimonio Arqueolóxico Lucense, que baixo o título “A Memoria da Pedra: O claustro do Museo Provincial de Lugo e as coleccións que alberga” se celebrarán os días 10 e 11 de abril de 2026. O acto contou coa participación institucional do vicepresidente da Deputación de Lugo, Efrén Castro, e a deputada delegada de Cultura, Iria Castro, acompañados pola xerente da Rede Museística Provincial, Encarna Lago, a directora do Museo, Aurelia Balseiro, e a técnica do Museo Provincial de Lugo, Ofelia Carnero. Organizadas pola Área de Cultura a través da Rede Museística, estas xornadas reafirman o compromiso da institución coa posta en valor e a difusión rigorosa do legado histórico da provincia.

Esta nova edición centra o seu interese científico no claustro do museo, un espazo que iniciou un proceso de mellora en 2025 coincidindo co seu 570 aniversario e que este ano celebra os 95 anos dende a súa declaración como Monumento Histórico-Artístico, hoxe recoñecido como Ben de Interese Cultural. A iniciativa xorde como un espazo de reflexión e intercambio arredor da historia desta arquitectura senlleira e das coleccións arqueolóxicas que custodia, utilizando a pedra como fío condutor que une o traballo dos canteiros coas máis de duascentas pezas que se expoñen nas súas arcadas.

O obxectivo fundamental é ofrecer unha visión integral que abranga dende a heráldica e a epigrafía ata a escultura relixiosa, analizando o claustro tanto pola súa relevancia monumental como pola súa función de espazo museal en constante evolución. A través da participación de especialistas de recoñecido prestixio, as xornadas pretenden ser un lugar de debate aberto á cidadanía onde se compartan estratexias de socialización do patrimonio e se afonde no significado histórico de pezas tan fundamentais como os capiteis ou os sepulcros que integran este conxunto único.

Con motivo das xornadas presentase unha guía interactiva do claustro que pode consultarse aquí