Castelao e o teatro: arte, escena e nación

Con motivo das obras convidadas do Museo de Pontevedra que se expoñen ata finais de 2026 na sala 25 do Museo Provincial de Lugo, organízase como actividade complementaria a III Xornada dedicada á vixencia de Castelao.

Seguindo o ronsel das dúas edicións anteriores, que procuraban poñer en valor a produción de Castelao, aportar visións transversais da súa obra, interpretar e reflexionar sobre o seu legado e fomentar o debate e a participación cidadá, neste caso profundaremos sobre Castelao e o teatro,da man de Ángeles Tilve Jar (Directora do Museo de Pontevedra).

Máis info: https://comunidadermpl.gal/obras-convidadas-do-museo-de-pontevedra/

Ángeles Tilve Jar

Licenciada en Xeografía e Historia, Sección Historia da Arte, coa especialidade en Arte Moderna e Contemporánea (1985), e grao de Licenciatura (1986) pola Universidade de Santiago de Compostela, desde 2023 é directora do Museo de Pontevedra, entidade á que está vencellada desde 1987. Ao longo de case catro décadas de traxectoria desenvolveu unha ampla experiencia na investigación, conservación, documentación e xestión das coleccións museísticas, desempeñando os cargos de conservadora e xefa da Sección de Coleccións antes de acceder á dirección do museo.

A súa actividade profesional está estreitamente ligada ao estudo, enriquecemento e difusión das coleccións do Museo de Pontevedra, participando na planificación científica da institución e impulsando proxectos de investigación, conservación e posta en valor do patrimonio artístico galego.

Conta cunha ampla experiencia no comisariado e na organización de exposicións temporais, tanto de carácter monográfico como colectivo, dedicadas á arte galega dos séculos XIX e XX, á ilustración, ao debuxo e ao patrimonio histórico-artístico. Así mesmo, participou na coordinación de proxectos expositivos relacionados coa recuperación e reinterpretación de figuras fundamentais da cultura galega, así como na difusión das coleccións do Museo en ámbitos nacionais e internacionais.

A súa produción científica supera o medio cento de publicacións entre libros, capítulos de obras colectivas, catálogos de exposicións e artigos en revistas especializadas. As súas principais liñas de investigación céntranse na historia da arte galega, o patrimonio histórico, a pintura, o coleccionismo e o estudo das coleccións do Museo de Pontevedra.

Entre as súas publicacións máis recentes destacan as dedicadas a Castelao, nas que aborda desde diferentes perspectivas a súa produción artística, o seu labor investigador e a dimensión patrimonial do seu legado. Entre elas figuran: Meu Pontevedra! Castelao 1916-1936, O Álbum Nós, El legado Castelao en el Museo de Pontevedra, As cruces de pedra na Galiza: o cumio do Castelao investigador no exilio ou Castelao en Bretaña (1929): investigación, identidade e diálogo atlántico arredor das cruces de pedra.