ESTRATEXIAS DE MUSEOLOXÍA SOCIAL 2023

O Consello Internacional de Museos (ICOM) determinou que o lema para o Día Internacional dos Museos (18 de maio) deste ano fora Museos, sustentabilidade e benestar.

Arredor desta efeméride, entidades museísticas de todo o mundo organizaron actividades que visibilizaron o papel dos museos en particular, e da cultura en xeral, no benestar o o desenvolvemento sostible das súas comunidades.

Ao fío desta celebración, e trala exitosa experiencia do ano pasado, na Rede decidimos abrir a nosa comunidade de aprendizaxe a todas as persoas vinculadas ao sector cultural, educativo, creativo,…da contorna iberoamericana, co obxectivo de facilitar unha reflexión colectiva sobre o noso papel como museos e sector cultural. A través de tres propostas sobre as que artellamos o programa Estratexias de Museoloxía Social 2023: 

  • O ciclo de conversacións “O impacto da cultura no benestar e na sostibilidade. Avaliar, medir, mellorar”
  • O módulo formativo “Avaliar para ser sostenibles. Deseño e implementación dun plan de avaliación en Museoloxía Social”
  • Espazos de participación e conexión dixital

Todas as propostas deste programa formativo gratuíto foron deseñadas para que as participantes puideran organizar o seguemento dos contidos dunha maneira autoxestionada e flexible. Coa posibilidade ao remate, trala verificación da participación, de solicitar un certificado.

Ciclo de conversas | O impacto da cultura no benestar e a sostibilidade. Avaliar, medir, mellorar

A partir do lema do Día Internacional dos Museos, e relacionada cunha liña de traballo da Rede Museística denominada I Foro Expandido da Museoloxía Social da RMPL, desenvolvemos este ciclo de charlas inspiradoras.

Con elas quixemos xerar un proceso de reflexión e aprendizaxe, no que abordar como activar prácticas museísticas e culturais para mellorar o benestar social e a sostibilidade. Pero tamén -e isto cremos que é moi importante- como avaliar e medir o seu impacto. Fixémolo dende perspectivas diversas e da man de profesionais de referencia no contexto internacional.

As conversas foron en liña e desenvolvéronse os martes do 02 de maio ao 13 de xuño, ambos incuídos, (17:00-18:30 | CET/UTC+1) coa posibilidade de visionalas en diferido no espazo dixital que acolle á comunidade de aprendizaxe.

Cartaz do ciclo de conversas da formación impulsada dende a Rede Museística Provincial de Lugo para traballar arredor de museos, sustentabilidade e benestar

CON QUEN CONVERSAMOS?

  • 02/05/23 | O Impacto Social da Cultura. Novas formas de medir e avaliar. Con Pau Rausell (Director de Econcult (Universitat de València) e Coordinador MESOC consortium)
  • 09/05/23 | Accesibilidade e Inclusión, metodoloxía para diagnosticar barreiras de acceso e participación. Estratexias de inclusión dende a empatía. Con Sergio Lago (BenCuriosa – Implementa Cultura Accesible), Encarna Lago e Ángeles Miguélez (Rede Museística Provincial de Lugo) 
  • 16/05/2023 | Arte e Educación, experiencias e aproximación metodolóxica para o encuentro entre contornas educativas, institucións culturais e prácticas artísticas transformadoras. Con Eva Morales Gómez (Co-fundadora de Pedagogías Invisibles)
  • 23/05/23 | Prácticas artísticas, participación e política, unha aproximación ao concepto de calidade da participación cultural e artística. Fortalezas, debilidades e “mitos” recorrentes. Con Hugo Cruz (Art and participation, Portugal)
  • 30/05/23 | Estratexias de sostibilidade ambiental, económica e social, da diagnose ao plan situado no contexto. Claves para activar un itinerario perdurable de xestión sostible e con impacto social. Con Giada Calvano (co-fundadora Chloe Sustainability e investigadora cultural)
  • 06/06/23 | Sostenibilidade dixital, reflexións e ferramentas para a avaliación da estratexia dixital en organizacións culturais. Con Elena Villaespesa (Digital Analytics Lead en la National Gallery of Art (Washington D.C.) e profesora asociada visitante en Pratt Institute School of Information (iSchool)
  • 13/06/23 | Artes na Saúde, experiencias integradas para previr e tratar enfermidades e para guiar e influír na promoción da saúde. Con Guillem d’Efak Fullana-Ferré (Responsable de Acción Comunitaria, Programas Públicos e Comunicación del Museu Nacional d’Art de Catalunya (MNAC)
Cartaz do ciclo formativo Avaliar para ser Sostibles

Acción formativa | Deseño e implantación dun plan de avaliación en museoloxía social

Dirixida e coordinada por Eloísa Pérez-Santos, profesora de avaliación psicolóxica da Universidade Complutense de Madrid e investigadora de públicos de museos.

Desenvolveuse en liña durante o verán no espazo dixital de Estratexias para a Museoloxía Social 2023. Actualmente ofrece a posibilidade dunha sesión práctica no Pazo do Tor o 13 de novembro. Tes toda a información clicando aquí!

AVALIAR PARA SER SOSTIBLES

A transformación dixital, acelerada durante a pandemia, fixo que os museos teñan ao seu dispor novas tecnoloxías para coñecer mellor ao seu público, ampliando as técnicas de recollida e interpretación de datos.

Sin embargo, estas oportunidades non deben desdibuxar a natureza e entidade da avaliación e os estudos públicos nos museos: a humanización dos datos, a importancia de obxectivos e indicadores ben definidos, o apoio a marcos teóricos ben fundamentados, a procura do rigor, a sostibilidade e a ética e, sobre todo, a comprensión de que a valoración e o coñecemento do público son unha ferramenta valiosa para reflexionar sobre o museo que queremos conseguir.

Se o noso modelo é o da Museoloxía Social, cobra aínda máis importancia establecer plans de avaliación que integren a posibilidade de medir o impacto real na nosa comunidade dos procesos e accións que activamos. Tanto en públicos non profesionais como en grupos de interese profesionais, artísticos, creativos, educativos, socioculturais e todos aqueles cos que colaboramos para acadar obxectivos de mellora en sostibilidade e benestar.

Ola 👋
Un pracer coñecerte.

Rexístrate ao noso boletín para recibir contido xenial na túa caixa de entrada, cada mes.

Non enviamos spam! Le a nosa política de privacidade para máis información.