Facémonos escoitar?

Mapa sonoro da memoria colectiva lucense vinculada á realidade LGTBIQA+

Temática:  Xéneros e igualdade

Mediante un chamamento dirixido á poboación de todo o territorio lucense durante o mes de xuño de 2021, recopilamos a través de audios de móvil testemuñas orais nas que se transmiten vivencias, anécdotas, experiencias e lembranzas vinculadas á temática LGTBIQA+ acaecidas ao longo do territorio provincial.

Resultado deste proceso é este mapa sonoro formado por fragmentos sonoros de numerosas persoas que ao longo das súas vidas viviron, presenciaron, sufriron ou celebraron momentos, afectos e vivencias que hoxe en día constrúen a realidade LGTBIQA+ da provincia de Lugo e que nos sitúan nun determinado punto do camiño no avance cara a construcción de sociedades nas que pague a pena vivir.

Este proxecto é froito dunha colaboración entre a Vicepresidencia da Deputación de Lugo a través da Rede Museística Provincial, o Colectivo Agrocuir da Ulloa e a Cooperativa Indaga, no marco das celebracións do Orgullo LGTB 2021.

Coincidindo co 15 aniversario da Rede Museística Provincial, tendo en conta a intención que dita Rede ten este ano de conciliar pasado, presente e futuro a través da recuperación da memoria, e en consonancia tamén co lema “O futuro dos museos. Recuperar e reimaxinar”, elexido este ano polo Consello Internacional dos Museos para a celebración do Día Internacional dos Museos, esta proposta representa unha boa oportunidade para recuperar lembranzas da poboación, do tecido social e das institucións da provincia de Lugo no eido LGTBIQA+, contribuíndo á necesaria celebración dos avances logrados na historia recente da provincia, e servindo tamén para identificar os obstáculos e retos aínda presentes.

Tamén lle pode interesar

  • Convite do dialogo de saberes sobre o motin de cervo a cargo da historiadora Alba Diaz Geada

Mulleres en rebeldía: o motín de Cervo, 1892

A historiadora mariñana Alba Díaz Geada, descubriranos o papel das mulleres nas revoltas do s. XIX provocadas pola suba dos consumos e a carestía da vida, especialmente aquel sonado motín de Cervo, encabezado polas mulleres do lugar, o 23 de agosto de 1892

Comparte nas túas redes