Percorrendo Fotografía a Cegas
4 de decembro, ás 11:30 horas, no Museo Provincial de Lugo
Dende o 4/12/2024 ao 29/12/2024
Con motivo do Día Internacional da Discapacidade, que se celebra o 3 de decembro, queremos compartir un resumo do camiño percorrido ao longo destes 13 anos de Fotografía a Cegas. Este proxecto, que naceu como unha iniciativa para adaptar postos de traballo para persoas cegas na Rede Museística Provincial, evolucionou ata converterse nunha proposta artística accesible, inclusiva e interdisciplinar.
Desde a súa creación, Fotografía a Cegas transformouse nun espazo no que participaron non só persoas con discapacidade visual, senón tamén a comunidade artística en xeral, incorporando disciplinas como a música, o vídeo e a danza. Durante estas edicións, fotógrafos cegos demostraron que as limitacións visuais non son un impedimento para a creación artística, evidenciando a súa capacidade creativa e o seu desexo de superación.
Este proxecto afianzouse como un exemplo único de como a arte pode transcender barreiras. Nas últimas edicións, os resultados non só foron impactantes desde o punto de vista artístico, senón tamén profundamente inspiradores. As experiencias vividas polos participantes amosan a riqueza que se adquire nunha actividade tan singular como a fotografía desde a perspectiva da discapacidade visual. Así, Fotografía a Cegas converteuse nunha ferramenta para romper prexuízos e demostrar o potencial que reside en cada persoa.
Edición Sinestesia
Un dos conceptos clave desta edición é o da sinestesia, esa fascinante unión de sensacións na que os sentidos se mesturan e enriquecen mutuamente. Este ano, a gran novidade é que dous dos obradoiros foron impartidos por persoas con discapacidade visual, ofrecendo unha perspectiva única. Estes obradoiros non só achegan ao público a realidade cotiá das persoas cegas, senón que tamén mostran o exemplo de como superar as barreiras que a sociedade impón.
Os relatores compartiron as súas experiencias como creadores e as estratexias que empregan para afrontar un mundo que ás veces lles é alleo. Estas historias de vida son unha fonte de inspiración e unha chamada á acción para construír unha sociedade máis inclusiva.
A nova edición de Fotografía a Cegas inaugurarase o mércores 4 de decembro, ás 11:30 horas, no Museo Provincial de Lugo. A exposición permanecerá aberta ata o 29 de decembro
