A Rede Museística Provincial de Lugo abre por terceiro ano consecutivo esta comunidade iberoamericana de aprendizaxe virtual a unha experiencia nova: un espazo de conversa, de posta en común e de pensamento colectivo. Dende a perspectiva investigadora e educadora da museoloxía social -en liña co lema do Día Internacional dos Museos deste 2024– e co foco posto no tempo.

Buscamos coñecer experiencias, pero tamén falar e debatir sobre educación e investigación nos museos e que condicións deberan darse para xerar contextos con tempo de calidade para que profesionais deste ámbito, outros axentes culturais e a propia comunidade poidan indagar, experimentar e aprender sobre as súas coleccións ou sobre as realidades sociais do territorio.

En definitiva, propoñemos  un espazo para as aprendizaxes, a investigación e as preguntas que se materializará nun espazo virtual de aprendizaxe aberto durante todo o ano, un ciclo de conversas en primavera e un obradoiro ás portas do outono.

Ciclo de conversas | Investigar e aprender no museo: outro tempo

tempo

  1. m. Grado de celeridade na execución dunha composición musical e, por ext., dunha composición poética.
  2. m. Ritmo dunha acción.
  3. Sucesión das cousas considerada como un continuo e que se divide en intervalos regulares naturais (ciclos da lúa) ou convencionais (minutos)

Con estas tres perspectivas do tempo, queremos achegarnos este mes de abril á educación e á investigación no museo e ás estratexias, formatos e experiencias que permiten dotar dos tempos necesarios para que profesionais dos museos e axentes culturais poidan investigar, pensar, xerar novas lecturas sobre as coleccións,... En definitiva,  xerar novo coñecemento.

Estas conversas celebraranse en liña, a través dun espazo virtual ao que se accede con inscrición previa.

Cartaz promocional de Estratexias de Museoloxía Social EdMS24, baseado na eira e os labirintos de pedra do Pazo de Tor. O lema desta edición son as conversas sobre investigar e aprender no museoe outro tempo

Obradoiro colectivo | Investigar e aprender no museo: outro tempo

Este obradoiro presencial desenvolverase en setembro e contará coa facilitación de dúas figuras profesionais de referencia: Leonardo Casado e Violeta Bronstein.

Será unha única xornada intensiva e suporá un exercicio de balance do escoitado, reflexión crítica e imaxinación colectiva

A inscrición nesta actividade aínda non está aberta. Avisaremos ás persoas inscritas no ciclo de conversas -e tamén a través das nosas canles- cando sexa posible solicitar praza nesta experiencia.

Ola 👋
Un pracer coñecerte.

Rexístrate ao noso boletín para recibir contido xenial na túa caixa de entrada, cada mes.

Non enviamos spam! Le a nosa política de privacidade para máis información.