ESTRATEXIAS DE MUSEOLOXÍA SOCIAL 2024

A Rede Museística Provincial de Lugo abre por terceiro ano consecutivo esta comunidade iberoamericana de aprendizaxe virtual a unha experiencia nova: un espazo de conversa, de posta en común e de pensamento colectivo. Dende a perspectiva investigadora e educadora da museoloxía social -en liña co lema do Día Internacional dos Museos deste 2024– e co foco posto no tempo.

Buscamos coñecer experiencias, pero tamén falar e debatir sobre educación e investigación nos museos e que condicións deberan darse para xerar contextos con tempo de calidade para que profesionais deste ámbito, outros axentes culturais e a propia comunidade poidan indagar, experimentar e aprender sobre as súas coleccións ou sobre as realidades sociais do territorio.

En definitiva, propoñemos  un espazo para as aprendizaxes, a investigación e as preguntas que se materializará nun espazo virtual de aprendizaxe aberto durante todo o ano, un ciclo de conversas en primavera e un obradoiro ás portas do outono.

Ciclo de conversas | Investigar e aprender no museo: outro tempo

tempo

  1. m. Grado de celeridade na execución dunha composición musical e, por ext., dunha composición poética.
  2. m. Ritmo dunha acción.
  3. Sucesión das cousas considerada como un continuo e que se divide en intervalos regulares naturais (ciclos da lúa) ou convencionais (minutos)

Con estas tres perspectivas do tempo, quixemos achegarnos á educación e á investigación no museo e ás estratexias, formatos e experiencias que permiten dotar dos tempos necesarios para que profesionais dos museos e axentes culturais poidan investigar, pensar, xerar novas lecturas sobre as coleccións,... En definitiva, xerar novo coñecemento.

Estas conversas celebráronse en liña, a través dun espazo virtual con inscrición previa na que participaron preto de 300 profesionais. Parte dos contidos e todas as conversas celebradas están dispoñibles en aberto aquí.

Cartaz promocional de Estratexias de Museoloxía Social EdMS24, baseado na eira e os labirintos de pedra do Pazo de Tor. O lema desta edición son as conversas sobre investigar e aprender no museoe outro tempo

CON QUEN CONVERSAMOS?

Reforzando a conexión iberoamericana da Rede formulamos estas conversas como unha oportunidade de vincular como convidadas a profesionais da contorna ibérica e de Latinoamérica. Todas referentes nos seus respectivos ámbitos de especialidade:

  • 09/04 | Conversación #1. Rufino Ferreras (Educador de Museos e director da Área de Educación do Museo Nacional Thyssen-Bornemisza) e Chiqui González (Xestora cultural, especialista en Infancias y Museos, ex-ministra de Innovación e Cultura da provincia de Santa Fe-Arxentina).
  • 16/04 | Conversación #2. Olaia Fontal Merillas (Directora do Observatorio de Educación Patrimonial en España -OEPE) e Nayeli Zepeda (Mediadora e investigadora – México/EEUU).
  • 23/04 | Conversación #3. Clara Boj (Artista, investigadora cultural e docente en la U.P.V. Co-directora do Programa Experimental de Mediación y Educación a través del Arte Permea-Consorci de Museus de la Comunitat Valenciana y Universitat de València) e Esteban Torres Hormazábal (xefe de Educación, Mediación e Audiencias do Museo Violeta Parra de Chile e Director de Museo de los Museos).
  • 30/04 | Conversación #4. María Cacheda Pérez (Xestora de patrimonio cultural e educación con perspectiva feminista e inclusiva. Área de Mediación da Axencia Catalana do Patrimonio Cultural) e Johanna Palmeyro (Museóloga, curadora pedagóxica e impulsora de Movimiento Justicia Museal).

Partindo destas conversas quixemos profundar na importancia de educación e investigación nos museos, así como coñecer experiencias sobre estratexias e formatos e que, con rigor educativo, permiten á cidadanía afondar en temáticas ou saberes. E aproximarnos ás claves e estratexias que axudan a que ese coñecemento se transmita entre participantes e coa comunidade.

Obradoiro colectivo |
En tempo presente

(ou sobre como amasar os tempos na xestión de museos)

Será unha única xornada intensiva, o luns 02 de setembro de 2024 de 10:30 a 18:30 no Pazo de Tor (Monforte-Lugo) e suporá un exercicio de balance do escoitado, reflexión crítica e imaxinación colectiva.

A RECEITA DA XORNADA DO 02 DE SETEMBRO

Este obradoiro presencial estará facilitado por dúas figuras profesionais destacadas: Leonardo Casado e Violeta Bronstein. A receita do día está organizada en 4 momentos:

● Pensando coas mans: Experiencia colectiva arredor do pan, dos tempos e do facer nos museos.

● Boas migas: Charlas e intercambio de saberes entre participantes.

● Estamos ao forno: Obradoiro creativo de xestión do tempo no deseño e realización de proxectos.

● Da artesa á mesa: fermentación compartida dun rexistro colaborativo de ferramentas, ideas e propostas para outro amasado de tempos no museo.

–

MARCO XERAL

– Alicia: canto tempo é para sempre?

– Coello branco: Ás veces, só un segundo.

–

Dentro das institucións museísticas, a dimensión do tempo é unha constante que á súa vez se fai imprescindible para interrogar. Un proxecto educativo, un posteo, unha curaduría, unha visita ou unha investigación están atravesadas ​​por tensións que esta variable pon en xogo. A súa percepción, medición e construción pode variar entre a perspectiva das visitantes e dos equipos que xestionan cada proxecto.

Se pan, como prefixo, significa todo, podemos afirmar que o tempo en toda organización tamén o é. En tempo presente é un encontro entre profesionais e colegas dos museos para fermentar e amasar aprendizaxes de forma compartida, no momento único e irrepetible do facer situado e cos demais.

No marco da Rede Museística Provincial de Lugo propoñemos un espazo para indagar na cociña da nosa vida cotiá profesional a partir das preguntas: como traballamos en tempo presente? Como calibramos o engranaxe museal coas nosas prácticas? Como xestionamos e imaxinamos o noso futuro dende o “aquí e agora”?

En tempo presente, convida a amasar unha xornada e un espazo de reflexión-acción para abordar o concepto de tempo e as súas condicionantes na xestión de proxectos, prácticas educativas e investigacións, en museos e espazos culturais.

–

Os obxectivos da xornada son:

● Promover espazos de intercambio transdisciplinar arredor do concepto tempo no museo a partir do facer compartido.

● Explorar técnicas e ferramentas para a xestión de proxectos, a partir de reflexións sobre procesos, tempos e metodoloxías de traballo.

● Fortalecer unha comunidade de práctica e colaboración entre colegas de diferentes museos da rede e da rexión.

–

  • A participación nesta xornada práctica é gratuíta.
  • Recoméndase tanto para persoas vinculadas ao ámbito museístico, como doutros contextos culturais e ámbitos próximos, como a mediación social ou a educación, entre outros.
  • As prazas son limitadas, polo que cubrir o formulario debe considerarse como unha solicitude de praza, que confirmaremos con suficiente antelación no correo electrónico que nos proporciones.

Ola 👋
Un pracer coñecerte.

Rexístrate ao noso boletín para recibir contido xenial na túa caixa de entrada, cada mes.

Non enviamos spam! Le a nosa política de privacidade para máis información.